O "Clamor" gaiteiro

Existe unha tradición no Deza chamada "O Clamor" que é unha rogativa que se fai entre as parroquias de Bermes e Vilariño na que o santo dunha das parroquias vai visitar en procesión ó outro según a rogativa sexa para que chova ou deixe de chover... No percorrido entre Bermés e Vilariño, os santos das outras parroquias saen en procesión o camiño a saudar os santos cando pasan...

Sobre esta idea, Chus Caramés (da A.C. Santa Ferreña) e K.G. (Froitos do Deza) falaron de facer un Clamor Gaiteiro consistente nunha festa de irmandade entre os Gaiteiros do Deza, Balouta e Trasdeza que (como non podería ser doutro xeito) será unha papatoria na que os nosos Santos terán o protagonismo... ¿que santos? pois sigue leendo!

Santa Ferreña

Os Gaiteir@s de Trasdeza teñen unha Santa Patrona que non é outra que Santa Ferreña, venerada no Mosteiro de Carboeiro na data dos Encontros de Música... unha Santa de verán milagreira e moi querida da que se contan innumerabeis miragres como curar resacas de licor cafe.

Santa Ferreña

Santa Ferreña subindo pola costa do Mosteiro de Carboeiro acompañada polos seus devot@s

entrada de Santa Ferreña no Mosteiro. Notese os cartiños ofrecidos polos devot@s en pago ós moitos milagres que obra.

Santo Torrisco

Santo Torrisco de Siracusa naceu en Catasós e viviu no século II na cidade de Siracusa. No ano 192 D.C., durante unha terrible ola de fame que ameazaba con deixar a cidade sen poboadores, Torrisco descubriu nunha alacena un anaco de touciño, do que, cortando finiño, sacou torresmos para tódolos habitantes, o que a historia chama “a milagre dos Torresmos”. Martirizado e queimado en Lalín polo Cónsul Panem Accuae, foi elevado ós altares co nome de Santo Torrisco de Siracusa polo Papa Angelicus Basterrae no ano 1989.

Oración

Dáme un torresmo
Santo Torrisco Bendito,
non mo des cru,
mellor dámo frito.

¡Hai Santo Torrisquiño!
¡Hai Santo Torriscazo!
¡Hai que favorciño!
Fixécheslle ó meu bazo.

Santo Torrisco bendito
dáme un torresmiño
dámo moi, moi grande
mellor que pequeniño

Santoral:
Sábado de Entroido

Indulxencias: Liberación do pecado do fornicio se é recitada con fe antes do acto

Os gaiteiros e músicos do Deza aclamámolo como santo patrón no Antroido de 1992 e dende aquelas acompañan o Santo no seu peregrinar polas tabernas o Sábado de Antroido que é cando descende do seu nicho onde é venerado todo o ano no Bar Barriga verde, sendo o Descendemento de Santo torrisco o inicio dos actos do Antroido...

nicho onde é venerado todo o ano no Bar Barriga verde

A Procesión de Santo Torrisco iniciase na Taberna da Praza onde se xuntan todos os devotos que o acompañan polas tabernas de Lalín.

A procesión do Santo inclúe a lectura das "Coplas dos Cegos" na que con mofa e escarnio pásase revista a todo o acontecido nese ano...

e despois de unha noite de devoción volve a ascender o seu nicho onde queda ata o seguinte ano...

En conclusión, temos dous santos milagreiros, e temos que buscar unha escusa para facer unha festa, asi que por seguir a idea do Clamor, temos pensado facer a festa na Ponte Taboada, fronteira natural entre o Deza e Trasdeza ó que chegariamos cada santo pola sua beira, acompañado dos seus devot@s e atoparianse na ponte....

E so nos queda sentarnos a facer festa e pasar un bó día de irmandade entre todol@s Gaiteiros...

¿que tal? a idea é boa e só queda poñela en práctica... a ver si para o ano que ven!

e por se queredes saber mais do Clamor, podedes consultar a seguínte obra: O clamor de Bermés e Vilariño Autores: José Angel López Gutiérrez Localización: Descubrindo: Anuario de estudios e investigación de Deza, ISSN 1139-7527, Nº. 3, 2001 , pags. 381-406